Nauðsynlegur í Nýja-Sjálfstæðisflokkinn

Ég þarf ekki að fjölyrða mikið um hæfni Þórlinds Kjartanssonar, vinar míns, til að takast á við ný og ögrandi verkefni. Allir, sem hafa unnið með Þórlindi, vita að hann er hamhleypa til verka og lætur hvorki björg né sker hindra sig. Hann er einnig óhræddur að fara nýjar leiðir og breyta af vananum, sem skapar honum ekki alltaf vinsældir. Og það er einmitt sem þreyttan Sjálfstæðisflokkinn vantar þessa stundina - nýja, sjálfstæða og drífandi þingmenn.

Þórlindur óskar eftir 4. sæti

Hagsmunatengslin liggja víðar

Salan á norska hluta Glitnis þarfnast rannsóknar, eins og margt annað í bankahruninu. Norskir sparisjóðir fengu bankann á algjörum gjafprís þar sem Finn nokkur Haugen lék tveimur skjöldum, annars vegar sem framkvæmdastjóri Sparebanken SMN, sem stóð að kaupunum á Glitni Bank ASA ásamt fleiri sparisjóðum og hins vegar sem stjórnarformaður tryggingasjóðs innistæðueigenda í Noregi. Í síðarnefnda hlutverkinu virðist hann hafa borið ábyrgð á því að tryggja sparisjóðunum lánalínur sem skilanefnd Glitnis bauðst ekki þegar reynt var að verja eignir bankans.

Norskir sparisjóðir keyptu Glitnir ASA  á 300 milljónir norskra krónafimm milljarða króna en bankinn er nú metinn á tvo milljarðar NOK - 34 milljarða króna! Verðmæti bankans hefur ríflega sexfaldast frá kaupunum.

Það þarf að rannsaka þátt norskra stjórnvalda og Finns Haugen í þessu söluferli.

Norskir kaupendur fengu lán framlengt

Þetta mun takast ...

Það er gott til þess að vita að verðbólgan fari nú lækkandi og verði komin undir 2,5% verðbólgumarkmið Seðlabankans eftir um eitt ár. Enda ekki seinna vænna því leita þarf aftur til maímánaðar árið 2004 til að finna verðbólguna undir 2,5%. Ef allt gengur að óskum tók það SÍ um 68 mánuði að ná því sem að var stefnt.

Fyrirtæki sem hefði sett sér svona jafn fáranleg markmið og Seðlabankinn gerði væri auðvitað löngu farið á kúpuna. 

Verðbólgan í hámarki

Fleiri skoða stofnun banka

Það er ekki bara hérlendis sem menn hafa verið að velta því fyrir sér að stofna nýjan banka til að bregðast við aðgerðarleysi bankakerfisins. Í Cambridge í Bretlandi skoðar hópur athafnamanna og frumkvöðla stofnun banka. "Við erum búnir að fá okkur fullsadda á því hvernig bankarnir eru starfræktir. Þeir bjóða fólki nánast ekkert fyrir innlán en rukka svo lítil fyrirtæki um 15 prósent fyrir lánalínur. Þetta er í grunvallaratriðum fáranlegt," segir Dr David Cleevely, talsmaður hópsins, í samtali við Independent. Hugmyndin er ekki einungis sprottin af samfélagslegri nauðsyn. Hann telur jafnframt að aðstæður séu kjörnar fyrir að stofna banka vegna þess mismunar sem er á innlánsvöxtum og útlánsvöxtum.

Hérlendis er ástandið orðið ömurlegt. Bankarnir þora varla að lána út krónu nema á 30% vöxtum og vilja tryggingar út fyrir líf og dauða. Góðar viðskiptahugmyndir, sniðnar að breyttu ástandi, eru kveðnar í kútinn. M.a.s. í kreppu sem þessari fæðast athyglisverðar hugmyndir.

Þar sváfu fjölmiðlar á verðinum

Ég hef velt því fyrir mér hvort fjölmiðlar hafi brugðist eftirlitshlutverki sínu með því að gera sparifjáreigendum ekki grein fyrir þeirri áhættu sem fylgdi því að geyma peninga í peningamarkaðssjóðum bankanna. Nú hafa borist fréttir af því að sölumenn bankanna hafi í einhverjum tilvikum haldið þeirri firru á lofti við fjárfesta, að peningamarkaðsbréf væru öruggur fjárfestingarkostur.

Hvar voru fjölmiðlar þegar Gnúpur lagðist á aðra hliðina í upphafi síðasta árs? Gnúpur var gírugt fjárfestingarfélag sem var eins konar “mini útgáfa” af FL Group. Félagið átti stóra eignarhluti í FL Group og Kaupþingi og hafði mikil lækkun hlutabréfa í fyrrnefnda fyrirtækinu á seinni hluta árs 2007 mikil áhrif á afkomu Gnúps og bankakerfið í heild. Hluthafar félagsins töpuðu öllu sínu og var það gert upp. Þetta hafði áhrif á bankana, sem áttu nú verðlaus skuldabréf í Gnúpi, og peningamarkaðssjóðina sem höfðu ennfremur fjárfest í slíkum bréfum. Var þetta forleikurinn að þeim harmleik sem síðar skall yfir.

Til dæmis hvarf tveggja vikna ávöxtun á peningamarkaðsbréfum Kaupþings þegar sjóðurinn varð að afskrifa Gnúpsbréf. SPRON-sjóðurinn varð einnig fyrir höggi en í stað þess að láta fjárfesta bera tjónið þá tók sparisjóðurinn (lesist hluthafar) höggið á sig!

Ég þekki til varkárra fjárfesta sem tóku alla sína fjármuni út úr peningamarkaðsbréfum banka og sparisjóða þegar Gnúpur fór í þrot og settu peningana inn á bankabók. Þeir sættu sig við það að verða af 3-4% vaxtamun en halda í staðinn í innistæðutrygginguna. Þessir menn voru sérfræðingar sem þurftu ekki að láta viðskiptablöðin upplýsa sig um stöðu mála. Hinir almennu fjárfestar höfðu hins vegar engan eða óljósan grun um þá áhættu fjárfestingar sinnar sökum getuleysis fjölmiðla til að kafa ofan í þetta mál og blekkinga sölumanna í bönkunum.

Dómstólaleiðin framundan

Er pundið sjúki maðurinn í Evrópu?

Áhrif fjármálakrísunnar á Íslandi og Írlandi teygja anga sína til Bretlands. Bankakerfið er á heljarþröm og verður vart bjargað nema með stórfelldum sameiningum og frekari eiginfjárinnspýtingu. Reyndar er spurning hvort pundið riði ekki endanlega til falls vegna vaxandi skulda breska ríkisins og lánshæfiseinkunn þess verði lækkuð.

Það eru ekki bara vondir skortsölumenn sem gera Bretum lífið leitt. Menn á borð við Jim Rogers hafa ráðlagt öllum að flýja Bretland hið snarasta og losa allar stöður í pundum. Gott ef Soros sé ekki sama sinnis.

Það gleymist í umræðunni að íslenskir bankar voru, þrátt fyrir stærð sína í hagkerfinu, með mun hærri eiginfjárhlutföll (CAD) en vestrænir bankar á góðæristímanum. Stóru bankarnir eins og RBS voru að keyra sig á lágum eiginfjárhlutföllum og súpa nú seyðið. Eftir því sem lengra líður frá íslenska bankahruninu verður deginum ljósara að fjármálakerfið og eftirlitsaðilar hérlendis voru hvorki verri né betri, hvað þá öðruvísi, en annars staðar.

 

Skortsalar að hrella bresku bankana á ný?

Yngsti formaður Framsóknarflokksins

Ef mitt sagnfræðiminni svíkur mig ekki þá er Sigmundur Davíð yngsti formaður Framsóknarflokksins frá upphafi, aðeins 33 ára gamall. Mig minnir að Ásgeir Ásgeirsson hafi verið yngstur formanna flokksins þar til í dag.

Eysteinn Jónsson varð þó ráðherra í "Stjórn hinna vinnandi stétta" aðeins 28 ára gamall. Hann tók við forystu flokksins af Hermanni Jónassyni snemma á 7. áratugnum.

Sigmundur kjörinn formaður

Sérstök staða í Framsókn

Það er komin upp skrýtin staða í Framsóknarflokknum. Flokkurinn vill hefja viðræður um Evrópusambandsaðild en styður ekki eina formannskandidátann sem studdi aðilarviðræður af heilum hug! Hvað vilja flokksmenn eiginlega?

Verkefni nýs formanns er að rífa fylgið upp og auka trúverðugleika flokksins. Það verður erfitt verkefni fyrir Höskuld eða Sigmund Davíð.

Höskuldur og Sigmundur áfram

Líða kúnnar fyrir vandræði skipafélaganna?

Íslensku skipafélögin standa í ströngu þessa dagana. Eigið fé Eimskipafélagsins er gufað upp og gott betur, innflutningur hefur verið að dragast hratt saman og útflutningur gæti dregist saman á þessu ári. Eignarhaldið á Eimskip er í uppnámi og óljóst er hvernig Ólafur Ólafsson í Samskip stendur.

En eitt er ljóst: Flutningskostnaður til Íslands hefur farið hækkandi sökum verðbólgu og gengislækkunar krónunnar. Því miður er samkeppnin það lítil að verðstríð mun seint geisa á milli íslensku skipafélaganna.

 

Mærsk í miklum vanda

Hver á Flögu?

Flögu hefur verið bjargað frá gjaldþroti eftir að Flaga Holdings breytti skuldum yfir í hlutafé. Flaga Holdings ku vera stærsti lánardrottinn félagsins og ætlar sér jafnframt að eignast svefnrannsóknarfyrirtækið að öllu leyti með því að leysa til sín bréf annarra hluthafa. En hver er þessi eigandi Flögu? Engar upplýsingar eru gefnar um það ef marka má umfjöllun fjölmiðla. Hvorki Nýi Kaupþing né Exista, sem voru stærstu bakhjarlar fyrirtækisins fyrir fall bankanna, hafa lagt félaginu til nýtt fjármagn.

Svona feluleikur með eignarhald hlýtur að vera á undanhaldi í íslensku viðskiptalífi. Kaupþing á kauprétt á nýjum bréfum í Flögu og ættu stjórnendur bankans að upplýsa um hver sé á bakvið Flögu Holdings fari svo að bankinn verði hluthafi á nýjan leik. Einnig finnst mér að núverandi hluthafar eigi heimtingu á því að vita hver sé að hirða upp bréfin þeirra.

Hlutafé Flögu Group nú sagt einskis virði