Icesave og LeBron James

Sérfræðingar hafa komist að því að Michael Jordan varð fljótari að verða meistari en LeBron James. Jordan varð fyrst meistari árið 1991 þegar Bulls lagði Lakers óvænt að velli. James, sem var að ljúka við sitt 7. keppnistímabil, hefur aldrei orðið meistari en Cavs féll með ótrúlegum hætti út úr úrslitakeppninni á dögunum þegar lið eldri borgara úr Boston, að undanskildu ónefndu ungmenni, pakkaði þeim saman. Gleymum þó ekki að Jordan var 28 ára gamall þegar hann tryggði sér sinn fyrsta meistaratitil og hafði í kringum sig Pippen og Grant sem voru engir aukvisar. James er enn á 26. ári.

Íslendingar horfa spenntir fram á sumarið hvort Icesave-deilan leysist. Alheimurinn bíður spenntur eftir hvort og hvert James fer en hann verður með lausan samning eftir 1. júní. Margir vona að hann semji við Bulls, jafnvel Knicks. Ef ég væri hann þá myndi ég endursemja við Cavs og klára dæmið í eitt skipti fyrir öll. Það er sem sagt líklegra að James verði NBA-leikmaður en að Icesave leysist. En nú er ég bara körfuboltadómari og þekki ekki hugsunarhátt leikmanna og stjórnmálamanna ...

Athugasemdir

[Helga Kristjánsdóttir, 16.5.2010 kl. 00:26]

Vaxandi vinsældir greinarinnar hér,minnka ekki við kjör forseta FÍBA,það er mikll heiður.

[Davíð Aðalsteinsson (IP-tala skráð) 16.5.2010 kl. 08:02]

Hvað á það að þýða að kalla Boston lið eldri borgara ?  Þeir hafa sýnt og sannað að það er liðsheildin sem skiptir öllu máli en í báðum einvígunum til þessa fyrst gegn Miami og svo gegn Cleveland þá sýndi það sig að það er ekki alltaf hægt að reiða sig á einn mann til að klára dæmið fyrir sig og þá á ég við Wade hjá Miami og LeBron hjá Cleveland því ef þessir menn áttu ekki toppleik eða rúmlega það þá áttu liðin ekki breik í Boston liðsheildina og spurning hvort sama verði uppi á teningnum næst gegn Orlando með Howard jafn mikilvægan og Wade og LeBron fyrir sín lið.