Össur og Össur hagnast

Á sama tíma og Viðskiptablaðið greinir frá söluhagnaði Össurar Skarphéðinssonar af sölu stofnfjárhluta í SPRON sumarið 2007 skilar stoðtækjaframleiðandinn Össur frá sér ágætu uppgjöri. Fyrirtækið, sem er í algjörum sérflokki íslenskra útrásar- og vaxtarfyrirtækja, virðist vera í góðum stöðu þrátt fyrir þrengingar í efnahagslífi heimsins og er áhugavert að sjá mikinn vöxt í sjóðstreymi á milli ára.  

Stjórnendur Össurar hafa bent á að sökum erfiðleika íslenska fjármálakerfisins hafi fyrirtækið orðið að vera sinn eigin banki. Félagið átti þannig 80 milljónir dala, nærri 10 milljarða króna, í sjóði um áramótin. Skuldsetning félagsins er lítil á íslenskan mælikvarða; nettóvaxtaberandi skuldir eru aðeins 2,4 sinnum meiri en rekstrarhagnaður fyrir afskriftir (EBITDA).

Skráning Össurar á danska hlutabréfamarkaðinn hefur tekist vel eins og gengisþróun undanfarinna mánaða ber með sér. Hins vegar sitja stjórnendur félagsins eftir með sárt ennið en þeir urðu að selja bréf sín á tombóluverði snemma á síðasta ári. Sannarlega grátleg niðurstaða.

Bréf Össurar hækka um nærri 10%

Athugasemdir

[Finnur Bárðarson, 4.2.2010 kl. 16:41]

Hann gæti orðið ansi langur listinn yfir stjórnmálamenn sem hafa hagnast, t.d. Illugi og Bjarni og margir fleiri

[Sigurjón Þórðarson, 5.2.2010 kl. 00:49]

Össur komst í mikinn REI-ham þarna um haustið þegar hann var nýbúinn að innleysa SPRON gróðann, ef ég man rétt þá skammaðist Össur út í allt og alla vegna þess að GGE sem Hannes Smárason stýrði fékk ekki að sameinast REI.

Mér finnst einhvern veginn líklegra en hitt að Össur hafi verið stórtækari í fjármálavafstri en hann lætur nú í veðri vaka.