Auðir seðlar til marks um afstöðu

Hundruðir kjósenda skiluðu auðu á kosningadaginn. Það þarf ekki mikið hugmyndaflug til að ímynda sér að fyrir þessum hópi hafi farið kjósendur sem styðja Sjálfstæðisflokkinn að öllu jöfnu. Það að kjósendur Sjálfstæðisflokksins hafi talið það fyrir bestu að velja engan flokk fremur en þann næstbesta er í mínum huga ekkert annað en skýr afstaða um að aðrir kostir hafi verið jafnslæmir og Sjálfstæðisflokkurinn. Og þetta var kannski eina tækifæri þessa hóps til að refsa flokknum fyrir þátt hans í bankahruninu og eftirmála þess.

Ég er því öldungis ósammála sumum sjálfstæðismönnum sem hafa talað með þeim hætti að með því að skila auðu hafi sjálfstæðismenn verið að styðja vinstriöflin. Ef hinn almenni kjósandi Sjálfstæðisflokksins skilar auðu þá er hann auðvitað að senda þau skilaboð að flokkurinn hafi gott af því að taka sér frí til þess vonandi að ná vopnum sínum á ný.

Sjálfstæðismenn sem styðja ESB-aðild þurftu ekki að kjósa Samfylkinguna því fyrr en síðar munu kjósendur fá að kjósa um það mál, hvað sem stefnu einstakra stjórnmálaflokkum líður. Það er óhjákvæmilegt að kjósa um ESB ef menn ætla sér að stíga einhver skref til framtíðar.  

Athugasemdir

[Valgeir (IP-tala skráð) 27.4.2009 kl. 19:22]

Að reyna að eigna Sjálstæðisflokknum þessi atkvæði er alveg út í hött. Ekki nokkur einasti maður (þú meðtalinn) veit afhverju þeir sem skiluðu auðu skiluðu auðu. Óánægja landsmanna er ekki flokksbundin.

[Júlli (IP-tala skráð) 28.4.2009 kl. 02:33]

Sammála, fáránleg kenning að þetta séu sjálfstæðismenn upp til hópa.

Ég skilaði auðu í staðinn fyrir að kjósa Samfó eins og ég hefði annars gert.

[Jón Ingi (IP-tala skráð) 28.4.2009 kl. 08:44]

maður veit nátturlega ekkert hve margir eru sjálfstæðismenn af þessum hópi, en ég veit fyrir vissu að þeir voru margir sem skiluðu auðu. sjálfur skilaði ég auðu til þess einmitt að refsa mínum mönnu, því að stjórnmál eru ekki eins og fótbolti = maður heldur ekki með sama flokknum þó hann hafi drullað á sig.

    fyrir mér verða sjálfstæðismenn að hætta að væla, rífa sig upp á afturlappirnar og fara að starfa af hugsjón og staðfestu. ekki væli og skítkasti sem þeir erfðu í heimamund stjórnarandstöðutilsins.

þannig að ég er sammála seinnipartinum hjá þér ;)

[Zaraþústra, 28.4.2009 kl. 12:10]

Líka töluvert fleiri en venjulega sem einfaldlega kusu ekki neitt og skiluðu ekki auðu.  Þessi 15% sem kusu ekki voru líklegast ekki bara letingjar.  Sumir ógildir seðlar voru væntanlega einhvers konar mótmæli líka (auðir seðlar eru líka ógildir, en menn eru oftast að reyna túlka hvað þeir þýða) eins og til dæmis sá sem skitið var á, hann var allavega ekki auður en sagði sitt.