Endurskrifar sögubækurnar

LeBron James hefur átt stórkostlegt tímabil og kemur fátt í veg fyrir að hann verði útnefndur leikmaður keppnistímabilsins (MVP). Gaurinn er með 30 stig í leik, rúm 7 fráköst og nærri 9 stoðsendingar og Cavaliers stefnir hraðbyri að fyrsta meistaratitli félagsins.

James er ekki nema rétt rúmlega 25 ára gamall og ætti þar af leiðandi eftir að eiga sín bestu ár, jafnvel 7-8 frábær keppnistímabil. Haldi hann sama dampi og forðist alvarleg meiðsl ætti NBA-stigamet Kareems Abdul-Jabbar að falla árið 2020. Jabbar var 28 ára þegar hann fór yfir fimmtán þúsund stiga múrinn en var um 42 ára þegar hann setti síðasta sveifluskotið niður.

En met eru til lítils án titla. Pressan verður mikil á James og félögum í vor.

LeBron James bætti met Kobe Bryant

Athugasemdir

[Dwight (IP-tala skráð) 20.3.2010 kl. 11:46]

Flott hjá LeBron og hann mun enda ferilinn sem einn af þeim allra bestu í sögunni.

Mér finnst hinsvegar furðulegt hvað fjölmiðlar, bæði erlendir sem og hér heima, einblína mikið á afrek LeBron en ekki annarra í deildinni. Nefni ég þar sem dæmi Dwight Howard. Það sem hann er að afreka er ekkert slor.

Yngsi leikmaður í sögu deildarinnar til að leiða deildina í vörðum skotum og yngstur til að ná 1000, 2000, 3000, 4000 og 5000 fráköstum.

Í fyrra komst hann í sögubækurnar fyrir að vera sá fimmti til að vera efstur í fráköstum og vörðum skotum á sama tímabili. Hinir sem gerðu það voru Kareem Abdul-Jabbar, Bill Walton, Hakeem Olajuwon og Ben Wallace. 

Verður fyrsti leikmaður í sögu NBA til að leiða deildina í fráköstum og vörðum skotum tvö ár í röð... og möguleiki á að hann verði fyrsti leikmaður í sögu deildarinnar til að leiða deildina í fráköstum, vörðum skotum og skotnýtingu. 

45 stig, 19 fráköst og 8 varin skot gegn Charlotte Bobcats ... fyrsti og eini leikmaður í sögu deildarinnar frá því varin skot voru talin (1973-74).

Þreföld tvenna gegn Thunder, 30 stig, 19 fráköst og 10 varðir boltar. Sá sem afrekaði það síðast á undan honum var Hakeem Olajuwon, þann 13. apríl 1996. 31 stig, 13 fráköst og 10 varin skot. 

NBA Finals met gegn Lakers, 9 varin skot í einum leik.

21 tvöföld tvenna í úrslitakeppninni á síðasta tímabili og leiðir deildina í þeim flokknum þetta árið, líkt og í fyrra. Einhvern tímann var ESPN með umfjöllun um 20-20 leikina hans, það er fjöldi leikja sem Dwight hefur náð 20 stigum og 20 fráköstum að lágmarki. Minnir að á síðasta tímabili hafi þeir verið um 13 talsins og Dwight var með 8 eða 9 af þeim leikjum (man þetta samt ekki nákvæmlega)

Auk þess eru fáir leikmenn í deildinni sem breyta sóknarleik andstæðinganna eins mikið og hann, leikskipulag annarra liða gjörbreytist gegn Orlando útaf varnarmanni ársins. Önnur lið reyna mun minna að komast að körfunni og breytast meira í stökkskotlið. Í raun má segja að Dwight sé upphaf Orlando í sókn og vörn. Fáir leikmenn í deildinni eru drifkraftur sinna liða á báðum endum vallarins. Margir eru góðir sóknar og varnarmenn, en Dwight er frábær varnarmaður og sókn Orlando keyrist áfram í gegnum hann (inside-out play) og ef vörn andstæðinga fellur niður á hann, þá er hann að verða nokkuð góður í að koma boltanum út frá sér til opinna skotmanna utan línunnar.. sem er eitt aðalvopn Orlando.

Gæti haldið áfram að leita að allskyns tölfræði um þennan dreng, en læt þetta duga. LeBron og Kobe eru ekki þeir einu sem eru að gera magnaða hluti. 

[Dwight (IP-tala skráð) 20.3.2010 kl. 11:49]

"45 stig, 19 fráköst og 8 varin skot gegn Charlotte Bobcats ... fyrsti og eini leikmaður í sögu deildarinnar frá því varin skot voru talin (1973-74)."

Vantaði "til að ná slíkri tölfræði" þarna aftan á. 

[Eggert Þór Aðalsteinsson, 20.3.2010 kl. 12:55]

Howard er að skila ótrúlegum tölum þótt hann muni aldrei slá frákastamet Chamberlains sem tók um 23 fráköst að meðaltali leik. Það met mun væntanlega standa um aldur og ævi. Hann á einnig langt í land að ná Olajuwon sem hefur varið flest skot í sögu NBA.