Litlar aðgerðir hjálpa fyrirtækjum

Fyrir ári síðan samþykkti Alþingi frumvarp fjármálaráðherra um tímabundna vaxtalausa greiðsludreifingu aðflutningsgjalda og vörugjalda. Um áramótin rann þessi greiðsludreifing út sem fól í sér að greiðslum var dreift á þrjá gjalddaga. Frá og með 15. mars verður sem sagt einn gjalddagi aðflutningsgjalda eins og var fyrir hrunið.

Það er varla hægt að segja að hagur atvinnulífsins hafi vænkast á síðustu mánuðum. Kostnaður vegna launatengdra gjalda hefur hækkað gríðarlega á síðustu mánuðum og gengi krónunnar mun varla styrkjast í komandi framtíð. Bankarnir eru varla byrjaðir að taka á vanda skuldsettra fyrirtækja. Í könnun Capacent Gallup, sem greint var frá í janúar, kom fram að 92% stjórnenda 400 stærstu fyrirtækja landsins töldu að aðstæður í hagkerfinu væru slæmar og 43% álitu að aðstæður myndu fara versnandi á næstu mánuðum.

 

Sá dráttur sem hefur orðið á endurreisn fjármálakerfisins, verulegur samdráttur í einkaneyslu og haftabúskapur, sem verður viðvarandi næstu árin, hafa dregið verulegan þrótt úr fyrirtækjum landsins. Litlar aðgerðir af hálfu hins opinbera geta hins vegar hjálpað fyrirtækjum mikið til eins og greiðsludreifing aðflutnings- og vörugjalda hefur sýnt. Með því að framlengja greiðslum áfram er hægt að láta hjól efnahagslífsins ganga áfram á meðan beðið er eftir að við finnum hinn svokallaða botn sem augljóslega hefur ekki verið náð.

Athugasemdir

[Marinó G. Njálsson, 8.2.2010 kl. 16:00]

Ég fékk einmitt svona sjálfvirka dreifingu í haust.  605 kr. var dreift á þrjá gjalddaga upp á kr. 201, 202 og 202.  Ég fékk þrjá seðla í hvern í sínu umslaginu.  Ríkið fékk sínar 605 kr., en ætli þetta hafi ekki kostað það hið minnsta 3.000 kr.  Það er gott og blessað að vera með svona aðgerðir, en inn í ferlið þarf að byggja einhverja skynsemi.

Önnur aðgerð nýttist mér og vafalaust fleiri sjálfstætt starfandi einstaklingum, en það var þegar gjalddagi virðisaukaskatts var framlengdur um allt að 10 daga.  Það skipti sköpum þegar þetta var gert, þar sem mjög mörg fyrirtæki voru mjög aðþrengd með lausafé.  Margir atvinnurekendur treystu því á að greiðslur vegna reikninga undangengis mánaðar væru  komnar inn svo hægt væri að greiða vaskinn.  Ég hef heyrt að þessi ráðstöfun hafi orðið til þess að flestum tókst að standa skil á vaskinum.  Þannig að rétt er að ýmsar litlar aðgerðir geta skipt sköpum.