Banki tekur á sig mannlega mynd

Mikið hlýtur Íslandsvinurinn Mike Ashley, eigandi Newcastle Utd. sem var fjármagnaður af Kaupthing Singer & Friedlander, að vera ánægður að vera búinn að fá  tvö tilboð í þetta fornfræga lið. Samkvæmt frétt DV er hinn rótgróni fjárfestingarbanki Seymour Price orðinn stjórnarmaður í Newcastle Utd. En ætli Ashley geri upp við skilanefnd Kaupþings að fullu?

Newcastle-menn gætu fengið nýja eiganda í vikunni. Mynd AFP.

Þriðjudagur 7. júlí 2009 kl 09:25

Höfundur: Ritstjórn DV ([e-mail])

Mike Ashley, eigandi Newcastle, gæti loks losnað við klúbbinn í vikunni en tvö tilboð upp á 100 milljónir punda hafa borist í félagið sem féll úr úrvalsdeildinni í vor. Áður höfðu fjögur boð upp á það sem talið er vera um 60 milljónir borist en Ashley var ákveðinn að selja á ekki minna en 100 milljónir punda.

Seymour Price, stjórnarmaður hjá Newcastle sem ætlað var að finna kaupendur, opinberaði þetta en eitt boðanna upp á 60 milljónir punda var frá fyrrum stjórnarformanninum, Freddie Shepherd.

Hann mun í vikunni meta bæði nýju boðin og gefa Mike Ashley sitt mat á þeim sem vilja kaupa klúbbinn. „Eins og staðan er erum við að meta þetta með lögfræðingum okkar og hjálpa þeim sem hafa áhuga á félaginu eins mikið og við getum að afla sér upplýsinga

Innovate og fleiri vond fyrirtæki

Gjaldþrot Innovate í Bretlandi var mikið áfall fyrir Eimskipafélagið. Félagið eignaðist Innovate að öllu leyti í júní 2007 með kaupum á 45% hlut í félaginu fyrir 3,7 milljarða króna. Þetta var í eina skiptið í útrás Eimskips þar sem kaupverðið var reitt af hendi með útgáfu nýrra hlutabréfa.
Aðeins ári eftir að Eimskip eignaðist Innovate afskrifaði það 74 milljónir evra þegar ljóst var að rekstur Innovate stóð ekki undir þeim væntingum sem til hans voru gerðar.
En Innovate var ekki eina fyrirtækið sem tengdist Eimskip beint eða óbeint sem fór flatt. Fortíðardraugurinn XL Leisure Group fór í gjaldþrot og féll þá 207 milljóna evra ábyrgð á félagið eftir að Samson gat ekki komið til bjargar. Hollenska frystigeymslufyrirtækið Daalimpex fór svo í þrot snemma á þessu ári þar sem Eimskip gat ekki endurfjármagnað það.

Vissi af vandamálum Innovate haustið 2007

Hagar fela reikningana

Verslanasamsteypan Hagar hefur fylgt í fótspor fjölda fyrirtækja, sem eru með skráð skuldabréf í Kauphöll Íslands, með því að birta ekki opinberlega ársreikning fyrir síðasta rekstrarár. Hagar vísa þar til undanþáguákvæða í 7. kafla verðbréfaviðskiptalaganna þar sem segir að útgefendur skuldabréfa geti að vissum skilyrðum uppfylltum komist hjá því að birta tölur sínar opinberlega.

Munurinn á Högum og þeim fyrirtækjum, sem hafa farið sömu leið í þessum efnum, er sá að rekstur Haga stendur traustum fótum að sögn forsvarsmanna félagsins - öfugt við hin félögin sem standa á heljarþröm.

Það er undarlegt að mínu mati að fyrirtæki, sem hafa í gegnum tíðina birt reikninga sína í Kauphöllinni, skuli nú leita allra leiða til að forðast opinbera birtingu. Þetta dregur klárlega úr gegnsæi í samfélaginu og veikir stöðu margra fjárfesta, t.d. þeirra sem eiga þessi fyrirtækjaskuldabréf. Hagar eru, í mínum huga, ekkert venjulegt fyrirtæki. Félagið ræður lögum og lofum á matvörumarkaði og býr einnig við sterka stöðu á sérvörumarkaði. Það er eðlilegt að almenningur geti áttað sig á stöðu fyrirtækisins, ekki síst þegar hefð hefur myndast fyrir birtingu reikninga félagsins.

Hagar verða að öllum líkindum beittir févíti af Kauphöllinni eins og hin fyrirtækin, þar á meðal Atorka Group, FL Group og Exista. Hagamenn ættu hins vegar að vera orðnir vanir að greiða sektir.

En hvað með tryggingagjaldið?

Þann 1. júlí hækkaði tryggingagjald úr 5,34% í 7,0%. Hækkunin nemur 31% og leggst af fullum þunga á fyrirtækin í landinu. Markmiðið er m.a. að bæta stöðu atvinnuleysistryggingasjóðs en á móti er varla hægt að ætla annað en að fyrirtæki reyni með öllum tiltækum ráðum að draga úr launakostnaði.

Hagdeild Landsbankans telur að hækkun trygggingagjald muni auka tekjur ríkissjóðs verulega, eða um 12,5 milljarða. Til samanburðar gæti hækkun kolefnisgjald skilað ríkissjóði um 7,7 milljörðum króna, að sögn hagdeildarinnar.

Það vekur athygli mína að SA, heildarsamtök atvinnulífsins, hefur lítið sem ekkert tjáð sig um þessa hækkun. Þar á bæ hafa menn meiri áhyggjur af kolefnis- og sykursköttum! Hafa forystumenn SA engar áhyggjur af hækkun tryggingagjalds sem mun að öllu óbreyttu hækka launakostnað fyrirtækja umtalsvert?

SA: Tillögur fjármálaráðuneytisins vanhugsaðar

Eignir urðu að dufti

Sá mikli bruni sem hefur orðið á eignum Eimskipafélagsins er með ólíkindum og einstakur þegar horft er til íslenskra rekstrarfyrirtækja. Á innan við einu ári hefur viðskipavild verið færð niður um 277 milljónir evra, eða um 50 milljarða króna miðað við gengi dagsins í dag. Annars vegar færði félagið eignarhlut sinn í Versacold Atlas niður um 177 milljónir evra (c.a. 31,5 milljarð króna) á síðasta rekstrarfjórðungi. Salan í Versacold hefur nú loksins gengið í gegn að hluta. Hins vegar nam virðisrýrnun eignasafnsins um 100 milljónum evra á 4. ársfjórðungi síðasta rekstrarárs. 

Á einu og hálfu rekstrari, frá 1. nóvember árið 2007 til 30. apríl 2009, nam heildartap Eimskipafélagsins rúmum 900 milljónum evra, jafnvirði 162 milljarða króna. Þetta gera um 300 milljónir króna á degi hverjum. Fjárfestingar félagsins í kæligeymslubransanum og fortíðardraugar frá Avion Group reyndust félaginu dýrkeyptar.

„ ... Gríðarleg skuldsetning félagsins reyndist óviðráðanleg. Sú staða er afleiðing nokkurra
illa ígrundaðra fyrirtækjakaupa erlendis og þeirri staðreynd að háar ábyrgðir féllu
á félagið ... “ sagði í fréttatilkynningu frá félaginu í gær.

 

 

 

Eimskip óskar eftir afskráningu

Mótaðgerðir nauðsynlegar

Á fyrstu fimm mánuðum ársins voru 100 fleiri fyrirtæki tekin til gjaldþrotaskipta en árið áður. Ríflega 400 fyrirtæki urðu gjaldþrota, eða um 80 á mánuði, flest í byggingariðnaði.

Hækkun tryggingagjalds úr 5,34% í allt að 7,0%, sem vinstri stjórnin hefur boðað, mun einungis auka á vanda fyrirtækjanna í landinu og líklega þrýsta á þau að segja upp fleira starfsfólki og/eða lækka launakostnað. Ég velti því fyrir mér hvort hugsanlegar mótaðgerðir til skemmri tíma gætu falist í lækkun greiðslna í lífeyrissjóðakerfið. Þannig yrði dregið úr gríðarlegri sjóðasöfnun nú á krepputímum. Í dag greiða fyrirtæki um 8% mótframlag í sameignarkerfið. Kanna ætti að lækka þetta hlutfall niður í 7% og mögulega að lækka mótframlag í séreignarsparnað í 1,5% úr 2,0%.

Þetta myndi auðvitað valda því að launþegar sæju fram á réttindaskerðingu í lífeyrissjóðum sínum. Aðgerðin gæti hins vegar komið í veg fyrir frekari kollsteypu fyrirtækja og kaupmáttarrýrnun launþega. Með því að létta á fyrirtækjunum til skemmri tíma væri jafnvel hægt til lengri tíma að tryggja nægjanlegt innflæði inn í lífeyrissjóðina.

Mér þætti gaman að vita hvort þessi lausn hefði verið skoðuð þegar atvinnurekendur og launþegasamtökin unnu að gerð stöðugleikasáttmálans?

66 fyrirtæki gjaldþrota í maí

Metinn á tíu milljarða króna

Átökin um Byr hafa tekið á sig einkennilega mynd. Í þessu máli er deilt um réttmæti stjórnarsetu Matthíasar Björnssonar í stjórn Byrs en hann hefur mikil tengsl við Jón Þorstein Jónsson, fyrrverandi stjórnarformann sparisjóðsins, sem ber höfuðábyrgð á aumri stöðu sjóðsins.

Lögmenn Matthíasar hafa krafist tíu milljarða króna tryggingar vegna mögulegs fjárhagslegs tjóns ef svo kemur í ljós að stjórnin situr í krafti löglegs meirihluta. Á sama tíma og lögmenn deildu um aðkomu Matthíasar að stjórninni sótti sparisjóðurinn um ríflega tíu milljarða króna framlag frá ríkinu á grundvelli neyðarlaganna. Lögmenn Matthíasar og hann sjálfur telja því að mögulegt tjón vegna hans sé jafngilt tíu milljarða króna ríkisframlagi!

Eggert, getur þú sagt þetta aftur? Já, lögmenn Matthíasar telja hann tíu milljarða króna virði. Til samanburðar má benda á að Aston Villa var talið tilbúið að borga Barcelona 3,5 milljónir evra, um 630 milljónir króna, fyrir Eið Smára, fræknasta fótboltamann landsins.

Vilja 10 milljarða tryggingu

Fyrirtækin borga líka brúsann

Það hefur farið lítið fyrir því að skattskyldir aðilar, aðrir en einstaklingar, eiga líka að borga gjald til útvarpsins ohf. Þessi skattlagning upp á 17.200 krónur leggst líka á fyrirtækin í landinu sem berjast í bökkum þessa dagana og mega við litlum áföllum.

Fyrir mörg fyrirtæki bætist útvarpsgjaldið ofan á verðtryggð stefgjöld sem eru innheimt af fullri hörku af hagsmunasamtökum listamanna.

Gjalddagar útvarpsgjalds þrír

Í umboði hluthafa eða lánardrottna?

Það kemur spánskt fyrir sjónir að sjá ekki meiri breytingar á stjórn Eimskipafélagsins þar sem nokkrir stjórnarmanna eru nátengdir Björgólfsfeðgum. Grettir, annar stærsti hluthafinn í Eimskip, er nú í gjaldþrotameðferð. Þegar haft er í huga að eigið fé félagsins var neikvætt um 174 milljónir evra í lok janúar er varla hægt að álykta annað en að lánardrottnar ráði lögum og lofum í fyrirtækinu. Hlutabréf félagsins eru nánast einskis virði. Og í raun og veru viðurkenna stjórnendur félagsins á síðasta afkomufundi að "fyrirtækið þarf á miklum stuðningi lánveitenda að halda til þess að klára endurskipulagningu."

Eitt helsta verkefni Eimskipsmanna hefur verið að selja kæligeymslur í Norður-Ameríku til þess að lækka gríðarlegan skuldabagga, en stefnt er að því að salan gangi í gegn í næsta mánuði. Kannski er fulltrúum hluthafa best treystandi fyrir því verkefni, og hreinsi þannig eftir sig mistökin. Eimskip birtir uppgjör í næstu viku og verður fróðlegt að sjá hvernig rekstur félagsins stendur nú.

Björgólfsmenn í stjórn Eimskipa

"Tax-free" fær nýja merkingu

Svava tískudrottning, í Sautján og NTC, hefur verið frumkvöðull á mörgum sviðum verslunar hérlendis. Það er ekki ofsögum sagt. Nú hefur hún endurskilgreint "tax-free" hugtakið sem Hagkaup hefur gert að vörumerki sínu. "Tax-free" merkir að kaupandinn fær afslátt sem nemur afnámi virðisaukaskatts (þó ekki í boði ríkisins). Íslendingar hafa aldrei verið sterkir í prósentureikningi. Telja margir að afslátturinn sé 24,5%, þ.e. virðisaukaskattsprósentan, en afslátturinn á "tax-free" dögum er í raun og veru 19,68%.

Nú auglýsir Retro í Smáralind, sem er í eigu NTC, "tax-free"-daga þar sem allar vörur fást með 15% afslætti.