Var FL fallið á útmánuðum 2007?

Á átján mánaða tímabili, frá miðju ári 2007 til ársloka 2008, tapaði FL Group um það bil 450 milljörðum króna. Mikið hefur verið fjallað um takmarkalausan rekstrarkostnað félagsins á árinu 2007 og virðast sumir halda að kostnaður hafi átt einhvern þátt í falli félagsins. Eins og þekktur bankastjórnandi sagði þá skiptir rekstarkostnaður engu máli þegar vel gengur og höfðu takmörkuð í tilfelli FL.

Það voru fjárfestingar FL í fjármálafyrirtækjum snemma á árinu 2007 sem felldu síðar fyrirtækið. Þar bar fyrst að nefna kaup félagsins á 3% hlut í Commerzbank á fyrstu mánuðum ársins sem ráðist var í þegar fyrstu áhrifa af undirmálslánunum tók að gæta í Bandaríkjunum. Félagið hélt áfram að kaupa í þýska bankanum fram á haust á sama tíma og markaðsverðmæti bankans hrapaði. Þó hefði mátt halda að Commerzbank hefði verið smávægilegur hluti af eignasafninu, enda var aðeins tvívegis minnst á þýska bankann í ársskýrslu FL fyrir árið 2007. Hannes Smárason og Jón Ásgeir tryggðu sér svo yfirráð yfir banka um vorið þegar FL eignaðist tæpan þriðjung í Glitni. Glitnir var svo fyrsti bankinn til að falla haustið 2008. 

Efnahagsreikningur FL Group bólgnaði út 60% á árinu 2007 og skuldir ríflega tvöfölduðust. Utan efnahagsreiknings voru svo miklar skuldbindingar vegna framvirkra samninga. Félagið var strax komið í afar erfiða stöðu áður en bólan náði hámarki á Íslandi í júlí 2007. Stórfelld eignasala og björgunaraðgerðir í þágu eigenda Baugs í lok árs skiluðu þar engu.

Forsvarsmenn FL Group voru reyndar ekki þeir einu sem skynjuðu ranglega aðstæður á fjármálamörkuðum á fyrri hluta ársins 2007. Kaupþing ætlaði sér í risayfirtöku á NIBC í Hollandi en féll frá því þegar lánsfjármarkaðir höfðu þurrkast upp.

350 milljarða tap Stoða

Athugasemdir

[Halli (IP-tala skráð) 12.12.2009 kl. 14:58]

Það er með ólíkindum að enn hafi enginn verið handtekinn vegna þessa hrikalega fjármálamisferlis, þetta er af þvílíkri stærðargráðu að tekur út yfir allan þjófabálk !

Hvers konar réttarríki búum við eiginlega í ?  Hvað er verið að kenna í refsirétti í háskólum landsins, hvað hefur liðið í dómsmálaráðuneytinu verið að gera undanfarinn áratug annað en að naga blýanta ?

Forsvarsmenn Fl Group (group væðingin er kómískt fyrirbæri fortíðarinnar) og helstu hluthafar, m.a. Fonsararnir Pálmi og Jóhannes eru einhverjir mestu krimmar þessa lands frá því að land var numið !

Nú þurfa yfirvöld að bretta upp ermar og þrífa kamrana svo um munar, þjóðarheill er að veði um ókomna tíð.