Glitnir er víti til varnaðar

Reynsla Íslendinga af norskum sparisjóðum ætti að vera bitur. Fyrir réttu ári síðan tóku norsku sparisjóðisamtökin yfir Glitnir Bank ASA, norska bankahluta Glitnis, fyrir brot af raunvirði án þess að skilanefnd bankans fengi rönd við reist. Þessi stórundarlegu viðskipti, sem aldrei hafa verið skýrð til fulls, fóru fram á 300 milljónir norskra króna en aðeins fáum mánuðum síðar mátu sérfræðingar bankann á tvo milljarða norskra króna. Bankinn, sem var myndaður úr BNbank og Kreditbanken, hafði því sexfaldast í virði á aðeins þremur mánuðum! Reyndar voru fleiri eignir úr eignasafni Glitnis í Noregi hirtar upp af hákörlum, t.d. Glitnir Securities.

Þáttur hins norska Finn Haugan var mikill í þessum viðskiptum en hann virðist hafa leikið tveimur skjöldum, annars vegar sem stjórnarformaður norska innistæðutryggingasjóðsins og hins vegar sem framkvæmdastjóri Sparebank 1 SMN, sem eignaðist fjórðungshlut í bankanum. Hann mun hafa krafist þess að bankinn yrði seldur eftir að allar lánalínur þornuðu upp.

Óskandi væri að rannsakendur bankahrunsins skoðuðu þessi viðskipti norsku sparisjóðanna ofan í kjölinn.

 

Íslendingar vilja að Norðmenn fjárfesti hér

Athugasemdir

[Jakob Þór Haraldsson, 12.10.2009 kl. 19:25]

Gæti ekki verið meira sammála þér, bilun að kröfuhafar Glitnirs skildu ekki útvega lánalínu svo hægt væri að ná "raunvirði fyrir þessa bankaeign" - norðmenn sáu sér leik á borði og náðu að ræna þessu á löglegan hátt...!

kv. Heilbrigð skynsemi (fun.blog.is)