Veðjar MP á frekari veikingu krónu?

MP Banki jók hreinar erlendar eignir um rúma 3,3 milljarða króna á fyrri hluta ársins. Þegar rýnt er í árshlutauppgjör bankans, sem kynnt var í síðustu viku, sést að erlendar eignir bankans umfram erlendar skuldir námu 9,1 milljarði króna í lok júní samanborið við hreina stöðu upp á tæpa 5,8 milljarða um síðustu áramót. Þetta er 70% hærri fjárhæð en sem nemur bókfærðu eigin fé bankans um mitt þetta ár. MP Banki er stærsta sjálfstæða fjármálastofnun landsins sem hefur ekki þurft á ríkisaðstoð að halda.

Fram kemur í tilkynningu frá bankanum að " ... eftir fall bankanna þriggja hefur MP Banki ekki átt kost á gjaldeyrisvörnum til leiðréttingar á gjaldmiðlaáhættu sinni." Bankinn greiddi upp öll útlán sín hjá erlendum aðilum að fullu á fyrri hluta ársins og tekur nú ekki við erlendum innlánum.

Margeir Pétursson er læsari á fjármálamarkaðinn en flestir aðrir og muna margir eftir því þegar hann kom fram í sjónvarpsþætti Markaðarins snemma á árinu og skoraði á lántakendur erlendra lána að greiða þau niður. Burtséð frá því hljóta menn að velta vöngum yfir þessari stöðu MP banka sem minnir óneitanlega á stöðutöku viðskiptabankanna gegn krónunni á sínum tíma. Forsvarsmenn MP veðja greinilega á frekari veikingu krónunnar. 

Athugasemdir

[Emmcee, 6.8.2009 kl. 21:22]

Jaðrar það ekki við markaðsmisnotkun að taka stöðu gegn krónunni og reyna svo að tala hana niður með því að hvetja til þess að fólk geri upp erlend lán?  Burtséð frá því hvort það hafi virkað eða ekki.  Uppgjör erlendra lána landsmanna kallar á útsölu á krónunni og frekara fall á gengi hennar.

3. tl 1 mgr. 117 gr. laga nr. 108/2007 um verðbréfaviðskipti:

[Með markaðsmisnotkun er átt við að] dreifa upplýsingum, fréttum eða orðrómi sem gefa eða eru líkleg til að gefa rangar eða misvísandi upplýsingar eða vísbendingar um fjármálagerninga, enda hafi sá sem dreifði upplýsingunum vitað eða mátt vita að upplýsingarnar voru rangar eða misvísandi.

[Kristleifur Daðason (IP-tala skráð) 7.8.2009 kl. 12:14]

Áhugavert. Þakka gott blogg.

Emcee,

mér finnst það vera siðferðismál í þessu tilfelli. Og eins og ég skil þetta þá er MP banki að gera sjálfur eins og hann hvetur aðra til að gera. Þannig að það ég sé ekki markaðsmisnotkun út úr þessu. Ekki hér og nú. Intressant pæling engu að síður.