Enn skal þjóðnýta

Þegar sparisjóðirnir BYR og Sparisjóðurinn í Keflavík fóru út í mikla aukningu stofnfjár á árinu 2007 fjármögnuðu gömlu viðskiptabankarnir Glitnir og Landsbankinn að stórum hluta stofnfjáreigendur sparisjóðanna með handveði í bréfunum. Nú standa nýju ríkisbankarnir frammi fyrir þeim vanda að veðin hafa fallið verulega í virði en lánin eru hins vegar orðin það mikil byrði á lántakendum að þeir munu líklega ekki geta staðið í skilum.

Það er ekkert launungarmál að Glitnir, og nú Íslandsbanki, hefur lengi horft girndaraugum til Byrs og nánast talið hann vera deild innan bankans. Allt var lagt í sölurnar að bjarga vanfjármagna Glitni með því að renna innlánsbankanum Byr inn í hann. Og nú gæti bankinn hæglega farið langt yfir leyfilegan eignarhlut í Byr kysi hann að leysa til sín stofnfjárbréf. Það að sameina Íslandsbanka og Byr væri hins vegnar enn ein aðgerð stjórnvalda í þjóðnýtingu fjármálakerfisins hérlendis, þ.e. að renna sparisjóðakerfinu inn í ríkisbankana sem er í mótsögn við fyrri yfirlýsingar sumra ráðherra um að verja eigi sparisjóðina. Ég efast einnig um að stofnfjáreigendur í Byr, viðskiptavinir og starfsmenn séu þeirrar skoðunar um að Byr eigi að renna inn í Íslandsbanka.

Mögulegt að Byr og SPKef renni inn í ríkisbankana

Athugasemdir

[Stefán Júlíusson (IP-tala skráð) 8.7.2009 kl. 11:40]

Það væri ekki verið að ræða þetta ef sparisjóðirnir væru ekki í vanda.  Þeir komu sér sjálfir í þennan vanda.  Ég hef fylgst með SpKef í nokkur á og það var augljóst að eitthvað var ekki alveg eins og það átti að vera.  Ef stofnfjáreigendur Byrs eru ósáttir, þá gætu þeir sett eina krónu af 3 sem þeir fengu í arð í fyrra og þá eru þessir 10 milljarðar komnir sem bankinn þarf.  Það er skrýtið ef þeir hafa ekki eitt öllum þessum arði á einu ári.

[Einar Guðjónsson, 8.7.2009 kl. 21:52]

Þú virðist einn af fáuum sem treystir yfirlýsingum íslenskra ráðherra. Sú eina sem þeir ætla að standa við er Iceslave loforðið gagnvart Bretum og Hollendingum.

[Jón Óskarsson (IP-tala skráð) 9.7.2009 kl. 08:58]

Það er ekki þjóðnýting fyrir fimmaura þó ríkið taki til sín eignir og þó meira væri.

Þetta er kallað á góðu máli að taka upp í skuldir. 

Þjóðin verður á einhvern hátt að ná til sín því sem búið er að stela af henni.

Ef tekst að taka rækilega upp í skuldirnar (þjóðnýta segja sumir) þá er það ekki bara hið besta mál heldur hið allra besta mál.

Það má selja síðar.