Mikilvægi Smáralindar fyrir Kópavog

Við, sem eigum okkar lifibrauð af Smáralind, hrukkum auðvitað í kút þegar við sáum uppgjör verslanamiðstöðvarinnar sem sýndi 4,3 milljarða króna tap. Niðurstaðan er þó langt í frá því um að kenna að verslun gangi brösuglega í Smáralind eins og margir hafa reynt að halda fram. Þvert á móti hafa nýjar verslanir sprottið upp á síðustu mánuðum eftir að eldri verslanir lögðu upp laupana. Helmingur af tapinu skýrist af því að bókfært virði Smáralindar lækkaði um tvo milljarða króna og þá tók félagið á sig högg vegna gengistryggðra lána.

Ég hef stundum velt því fyrir mér hvort Kópavogsbúar og stjórnendur bæjarfélagsins átti sig á mikilvægi Smáralindar fyrir byggðarlagið. Þetta er óumdeilanlega stærsti vinnustaðurinn í sveitarfélaginu þar sem 800 starfsmenn sækja vinnu sína á degi hverjum og dregur þar að auki til sín fleiri þúsund viðskiptavini í viku hverri. Þegar rýnt er í reikninga Smáralindar kemur svo ótrúleg tala í ljós. Félagið greiddi hvorki meira né minna en 264 milljónir króna í fasteignagjöld á síðasta ári eða tæpan fjórðung af rekstrartekjum. Þótt fasteignaskattar af atvinnuhúsnæði séu mun hærri en af íbúðarhúsnæði ætla ég að setja þetta í samhengi við skatttekjur bæjarins af íbúðarhúsnæði. Segjum svo að eigandi 100 fermetra íbúðar greiði alls 120 þúsund krónur í fasteignagjöld á ári þá greiðir Smáralind álíka mikið í fasteignagjöld og eigendur 2.200 eitt hundrað fermetra íbúða í Kópavogi! 

Þarf að hafa fleiri orð um hversu mikil gullkista Smáralind er fyrir Kópavog?

Athugasemdir

[Einar Guðjónsson (IP-tala skráð) 22.4.2009 kl. 13:21]

Er ekki málið að gera eins og sveitarfélögin:grenja út að fá að taka á móti flóttamönnum og láta þá KAUPA KAUPA og þeir geta þá fyllt tómu blokkirnar í Kópavogi líka.Annars er þetta tap bara sett út í vöruverðið í öðrum Baugsbúðum.Svona verslunarmiðstöð er m.a. ástæðan fyrir því að vöruverð á Íslandi er miklu hærra en í nágrannalöndunum.Þetta þýðir því nú þegar mikin styrk frá neytendum til Kópavogsbæjar.

[Ásta B (IP-tala skráð) 22.4.2009 kl. 21:50]

Sæll

Hver á Smáralind?

Er það ekki Baugsfjölskyldan?

Hef ekki komið inn í Smáralind né Kringluna frá því í október.

[Eggert Þór Aðalsteinsson, 22.4.2009 kl. 22:58]

Mér skilst að ríkið eigi tæpan helmingshlut í Smáralind í gegnum Íslandsbanka. Og væntanlega eykst sá hlutur á næstu mánuðum.

[Bjarni G. P. Hjarðar, 22.4.2009 kl. 23:31]

Alltaf gaman að lesa skemmtileg blogg. Þú rifjar upp hjá mér að þegar sláturhúsið á Kópaskeri fór í þrot í þriðja sinn, þá sögðu sveitarstjórnarmenn að byggingarnar færu nú ekki neitt! Ég held sem sagt að það væri gæfa Kópavogsbúa ef Smáralind færi á höfuðið.