Evran er ekki alslæm

Skuldavandi Evruríkja gerir það eflaust að verkum að evran mun veikjast enn þá frekar. Spá sumir sérfræðingar að hún muni lækka niður í $1,1, sem svarar til ríflega 10% lækkunar, áður en hún nær jafnvægi.

Þessi lækkun evrunnar er alls ekki slæm við Evrulöndin eins og málflutningurinn hérlendis gefur til kynna, enda gerir veikingin svæðið samkeppnisfærara með tilliti til útflutnings. Einnig er langt í frá að evran sé veik í sögulegu ljósi. Ég man þann tíma er hún stóð í $0,85-0,9 í byrjun aldarinnar. Á aðeins átta árum, frá 2000-2008, tvöfaldaðist hún í verðgildi gagnvart Bandaríkjadal. Á móti má fastlega reikna með að stefnan í peningamálum verði harðari til þess að bregðast við mögulegri verðbólgu. Og kannski veitir ekkert af.


mbl.is Hagvöxtur í Japan
Tilkynna um óviðeigandi tengingu við frétt

Nú þarf að gefa í

Blessuð krónan hefur verið á hraðri styrkingu frá því að vextir voru síðast lækkaðir. Verðbólga fer að öllum líkindum hratt lækkandi á næstu mánuðum. Það eru allar forsendur fyrir hendi að lækka stýrivexti í stærri skrefum eins og minnihluti peningastefnunefndar vildi. 

Af öllum þeim lausnum sem hafa verið nefndar til þess að endurreisa hagkerfið og bæta hag heimila og fyrirtækja er engin betri en að lækka vexti. Skuldsett þjóðfélag, sem er með brækurnar á hælunum, þarf á vaxtalækkun að halda.


mbl.is Tveir vildu lækka vexti meira
Tilkynna um óviðeigandi tengingu við frétt

Ég klóra þér ef þú klórar mér

Það er óumdeilt að kaupin á Big Food Group voru ein bestu kaup Íslendinga í útrásinni og lék Malcolm Walker þar stórt hlutverk að ná tökum á rekstri Iceland-keðjunnar sem mátti muna fífil sinn fegurri. Íslendingarnir fengu blóðbragð í munninn og voru búnir að greiða sér til baka kaupverðið aðeins tveimur árum eftir yfirtökuna. Þannig fengu hluthafar Iceland alls 39 milljarða króna í arð vorið 2007 sem Landsbankinn fjármagnaði. Þar af fengu Walker og stjórnendur Iceland 7,8 milljarða fyrir sinn snúð. Baugur fékk yfir tólf milljarða.

Fyrir nokkru lögðu "þöglir fjárfestar" fram 600 milljónir króna inn í 365 fjölmiðlasamsteypuna til þess að tryggja yfirráð Jóns Ásgeirs Jóhannessonar og Lilju Pálmadóttur yfir félaginu. Þessir hluthafar hafa engan atkvæðisrétt en ganga fyrir arðgreiðslum eins einkennilega og það hljómar þegar rekstrarsaga íslenskra fjölmiðla á borð við 365 er höfð í huga. Leyndin yfir viðskiptunum er þó verri þegar almenn krafa er uppi um að eignarhald fjölmiðla sé gegnsætt. 

Það skyldi þó ekki vera að erlendir meðfjárfestar Jóns Ásgeirs, t.d. Malcom Walker, sir Tom Hunter og Don McCarthy, séu meðal "hulduhluthafa" í 365?

 

 


mbl.is Forstjóri Iceland hrósar Jóni Ásgeiri
Tilkynna um óviðeigandi tengingu við frétt

Icesave og LeBron James

Sérfræðingar hafa komist að því að Michael Jordan varð fljótari að verða meistari en LeBron James. Jordan varð fyrst meistari árið 1991 þegar Bulls lagði Lakers óvænt að velli. James, sem var að ljúka við sitt 7. keppnistímabil, hefur aldrei orðið meistari en Cavs féll með ótrúlegum hætti út úr úrslitakeppninni á dögunum þegar lið eldri borgara úr Boston, að undanskildu ónefndu ungmenni, pakkaði þeim saman. Gleymum þó ekki að Jordan var 28 ára gamall þegar hann tryggði sér sinn fyrsta meistaratitil og hafði í kringum sig Pippen og Grant sem voru engir aukvisar. James er enn á 26. ári.

Íslendingar horfa spenntir fram á sumarið hvort Icesave-deilan leysist. Alheimurinn bíður spenntur eftir hvort og hvert James fer en hann verður með lausan samning eftir 1. júní. Margir vona að hann semji við Bulls, jafnvel Knicks. Ef ég væri hann þá myndi ég endursemja við Cavs og klára dæmið í eitt skipti fyrir öll. Það er sem sagt líklegra að James verði NBA-leikmaður en að Icesave leysist. En nú er ég bara körfuboltadómari og þekki ekki hugsunarhátt leikmanna og stjórnmálamanna ...


Stjórnarhættir sem má læra af

Stelios riddari fer í sögubækur íslensks viðskiptalífs fyrir það að hafa staðið í vegi fyrir að FL Group, undir stjórn Hannesar Smárasonar, kæmist til frekari áhrifa innan easyJet. FL Group hagnaðist að vísu um þrettán milljarða króna við sölu á 16% hlut í breska lággjaldaflugfélaginu sem var ein best heppnaða fjárfestingin í útrásinni.

Stelios var þá stjórnarformaður easyJet og var og er enn stærsti hluthafinn í félaginu í gegnum easyGroup (sem er ekki í eigu félagsins sjálfs). Það vekur athygli að hann skuli yfirgefa stjórn félagsins þar sem hann telur hagsmunum sínum betur borgið að sitja utan stjórnar og hafa þannig áhrif á stefnu félagsins sem "venjulegur" hluthafi. Stelios á reyndar í deilum við easyJet um notkun vörumerkisins "easy".

Eitt af því sem var gagnrýnt harðlega á íslenskum hlutabréfamarkaði voru ítök stórra hluthafa í almenningshlutafélögum, sem misnotuðu aðstöðu sína á kostnað smærri hluthafa. Gróf dæmi eru orðin óteljandi í bönkum og sparisjóðum. Eitt af því sem gæti aukið tiltrú á endurreistum hlutabréfamarkaði væri að auka óhæði stjórnarmanna og koma mönnum í skilning um að stjórnarmenn eiga að gæta hagsmuna allra hluthafa. 


mbl.is Stofnandi EasyJet úr stjórn
Tilkynna um óviðeigandi tengingu við frétt

Andi Jóns svífur yfir HoF

Áhrif Jóns Ásgeirs fara dvínandi, enda sótt að honum úr öllum áttum. Skyldi hann hafa haft frumkvæði að afsögn sinni eða var það vegna þrýstings skilanefndar Landsbankans sem heldur utan um þann hlut sem Baugur átti?

Þrátt fyrir að Jón Ásgeir yfirgefi stjórn House of Fraser mun andi hans eflaust svífa yfir HoF, þess merka fyrirtækis. Gunnar Sigurðsson, fyrrverandi forstjóri Baugs, situr þar í umboði skilanefndarinnar og auk þess Kevin Stanford, sem var meðal stærstu hluthafa í FL Group, og Don McCarthy eiga þar sæti. Stanford og McCarthy voru líka hluthafar í Baugi Group. 


mbl.is Jón Ásgeir segir sig úr stjórn House of Fraser
Tilkynna um óviðeigandi tengingu við frétt

Kvalalaust hjá Hval hf.

Þótt hvalveiðar muni kannski ganga seint og illa á þessu sumri verður seint sagt að Hvalur hf. lepji dauðann úr skel. Hvalur hf. byggir nefnilega afkomu sína ekki á hvalveiðum heldur eignarhaldi verðbréfa. Félagið á um 98% í Vogun fjárfestingarfélagi, sem er stærsti hluthafinn í HB Granda og Hampiðjunni. Hlutur Vogunar er um 40% í Granda, stærsta útgerðarfélagi landsins.

Eigið fé Hvals nam 5,7 milljörðum króna skömmu fyrir bankahrun og voru skuldir fyrirtækisins hverfandi. Sennilega standa fá fyrirtæki jafn traustum fótum um þessar mundir og Hvalur hf.

Ég vona þó að sjá hvalveiðskipin halda úr höfn sem fyrst þannig að við getum nýtt okkar auðlindir með eðlilegum og sjálfbærum hætti og skapað störf og jafnvel gjaldeyri.


mbl.is Óvissa um hvalveiðar vegna lagafrumvarps
Tilkynna um óviðeigandi tengingu við frétt

Gleymdu stjórnendur LÍ að flagga?

Eins og kemur fram í skýrslu RNA réðu stjórnendur Landsbankans yfir stórum hlut í bankanum í gegnum átta aflandsfélög sem voru mynduð utan um kaupréttarsamninga við starfsmenn bankans. „Eignarhaldið var ekki tilkynnt opinberlega og því vissu smærri hluthafar, almennir fjárfestar og eftirlitsaðilar ekki að stjórnendur fóru í reynd með næststærsta eignarhlut í bankanum,“ segir í frétt Þórðar Snæs Júlíussonar á Viðskiptablaðinu, sem tekur þetta upp úr skýrslu RNA. Ekki verður betur séð en að félögin hafi lotið sömu stjórn.  

Marga grunaði að stjórnendur Landsbankans færu með hluti í þeim aflandsfélögum sem voru meðal stærstu hluthafa bankans. Hins vegar kemur á óvart að hlutur þeirra hafi verið svo stór eða 13% af hlutafé bankans og er ótrúlegt til þess að vita að þessar upplýsingar hafi ekki legið fyrir opinberlega.Fram kemur að fyrir aðalfund Landsbankans árið 2007 bað Sigurjón Þ. Árnason, bankastjóri LÍ, fyrrum forstöðumann skattasviðs LÍ um að safna umboðum frá stjórnum erlendu fjárhagsfélaganna. Forstöðumaðurinn fór því með atkvæðisrétt aflandsfélaga á fundinum og greiddi atkvæði, m.a. til þess að tryggja það að tillaga stjórnar um að starfskjarastefna bankans næði fram að ganga.

Hér hljóta menn að velta því fyrir sér hvort flöggunarreglur hafi verið brotnar fyrir aðalfundinn 2007 fyrst stjórnendur kusu að nýta sér atkvæðisréttinn sem fylgdu bréfunum. Í 78 gr. laga nr. 108 um verðbréfaviðskipti segir m.a. „Eigandi, sem aflar eða ráðstafar hlutum í útgefanda hlutabréfa sem tekin hafa verið til viðskipta á skipulegum verðbréfamarkaði, skal senda með sannanlegum hætti tilkynningu til viðkomandi útgefanda og Fjármálaeftirlitsins ef öflunin eða ráðstöfunin leiðir af sér að atkvæðisréttur hans nær, hækkar yfir eða lækkar niður fyrir eitthvert eftirtalinna marka: 5, 10, 15, 20, 25, 30, 35, 40, 50, 66 2/3 og 90%. Með eiganda er átt við sérhvern einstakling eða lögaðila, sem fer beint eða óbeint með: 1. hluti í útgefanda í eigin nafni og fyrir eigin reikning ... “

Í 79. gr. 1. mgr. 8. Tl. um flöggunarskyldu við sérstakar aðstæður segir hins vegar að flagga beri þegar „ ... umboðsmaður fer með, að því tilskildu að hann geti neytt atkvæðisréttarins samkvæmt eigin ákvörðun berist ekki sérstök fyrirmæli frá eigendum hlutanna.Eitt af markmiðum með því að setja kauprétti starfsmanna inn í aflandsfélög var að komast hjá flöggunarskyldu. Stóra spurningin hlýtur að vera sú hvort stjórnendur Landsbankans hafi gerst brotlegir við lög með því að nýta 13% atkvæðisrétt á aðalfundi árið 2007?


mbl.is Ætlun Kaupþings var að hafa áhrif á markaðinn
Tilkynna um óviðeigandi tengingu við frétt

Hagnast um 50 milljarða króna

Stóru viðskiptabankarnir skiluðu samtals ríflega 50 milljarða króna hagnaði á síðasta ári sem eru tölur sem sáust um miðjan áratuginn. Rekstrartekjur þeirra námu 125 milljörðum og hreinar vaxtatekjur rúmum 72 milljörðum króna. Íslandsbanki skilar langbesta uppgjörinu ef horft er til arðsemi. Arðsemi eiginfjár bankans var nærri 30% samanborið við 16% hjá Arion og 10% hjá Landsbankanum. 

Einhvern tíma hefðu tölur sem þessar gefið tilefni til þess að draga tappa úr flöskum og fagna vænum bónusgreiðslum.


mbl.is Hagnaður Arion banka 12,8 milljarðar
Tilkynna um óviðeigandi tengingu við frétt

Af hverju ekki dómstólaleiðin?

Af hverju leitar Marel ekki til dómstóla til þess að fá úr skorið um þessa túlkun FME? Þetta hlýtur að vera stóra spurningin eftir að félagið brást hart við úrskurði FME. Hins vegar munu stjórnendur una sektinni eins og kemur fram í fréttatilkynningu og aðhafast ekkert frekar.

Útgefendum fjármálagerninga er heimilt að fresta birtingu upplýsinga til að vernda lögmæta hagsmuni sína. Þar er einkum horft til þess ef birting upplýsinga getur haft áhrif á niðurstöðu samningaviðræðna, einkum ef fjárhagsafkoma útgefanda er í mikilli eða yfirvofandi hættu.

Er það ekki eðlilegur hlutur að menn og fyrirtæki fari með ágreiningsmál fyrir dómstóla landsins?


mbl.is Marel gert að greiða 5 milljónir í stjórnvaldssekt
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband